Högna Sigurðardóttir - Efni og andi í byggingarlist

Þetta er fyrsta einkasýning á verkum Högnu Sigurðardóttur á Íslandi og er hún unnin í náinni samvinnu við Arkitektafélag Íslands. Högna er vel þekkt sem frumkvöðull á sviði byggingarlistar á Íslandi. Hún hefur með verkum sínum haft mikil áhrif á sjónrænt umhverfi okkar og þróun íslenskrar byggingarlistar, ekki síst með listrænni tilvísun í byggingarlistararfinn, dirfsku í notkun náttúrulegra efna auk skúlptúrel formsköpun bygginga sinna.

Högna var fyrst kvenna til að starfa sem arkitekt hérlendis, og hefur verið óhrædd við að fara frumlegar leiðir að verkum sínum, þar sem finna má tilvísun í þekkta erlenda arkitekta 20. aldarinnar -  svo sem Le Corbusier, Louis Kahn, Tadao Ando og fleiri, en jafnframt haldið á lofti afar persónulegri túlkun og nálgun að verkum sínum. Högna vakti á sínum tíma athygli fyrir að vinna byggingu og innviði hennar sem eina heild og steypa þannig innréttingar, húsgögn og blómaker með innra rými byggingarinnar, auk þess að forma nánasta umhverfi hennar sem órjúfanlegan hluta af heildarmynd hins manngerða umhverfis.  

Högna útskrifaðist sem arkitekt frá École Nationale Supérieure des Beaux-Arts í París árið 1960 og hlaut sérstaka viðurkenningu skólans fyrir lokaverkefni sitt Garðyrkjubýli í Hveragerði. Þá þegar var áhugi hennar á sérkennum landsins, íslenskrar náttúru og veðurfars innblástur í frumlega og sérstaka byggingarlist, sem hún þróaði áfram í seinni verkum sínum.

Högna hefur búið og starfað í Frakklandi allt frá námsárunum en jafnframt því skapað mörg bestu verka sinna hérlendis. Henni hefur hlotnast fjöldi alþjóðlegra viðurkenninga fyrir verk sín, og tók meðal annars sæti í hinni virtu Frönsku Byggingarlistarakademíu árið 1992, auk innlendra viðurkenninga svo sem menningarverðlauna DV í byggingarlist 1994 og heiðursorða Sjónlistaverðlauna Listasafns Akureyrar 2007. Íbúðarhús sem hún teiknaði að Bakkaflöt í Garðabæ hefur verið valið sem ein af 100 merkustu byggingum 20.aldarinnar í Evrópu.

Árið 2008 var Högna Sigurðardóttir kosinn heiðursfélagi Arkitektafélags Íslands.

ÍGrein sýningarstjóra (pdf)

Viðburðir sem tengjast sýningunni:

Málþing, laugardaginn 14. nóvember kl. 14-17
Þátttakendur með erindi í pallborði verða Steinþór Kári Kárason, Jes Einar Þorsteinsson, Margrét Harðardóttir, arkitektar og Þóra Sigurðardóttir listamaður. Erindi Steinþórs ber heitið Högna, Kahn og herbergin, erindi Jes Einars Námið í París og samstarfið við Högnu, Margrétar Tímalaus minni og erindi Þóru Allt kemur heim og saman.

Laugardag 28. nóvember kl. 15
Kjarvalsstaðir - Högna Sigurðardóttir
Sýningarstjóraspjall  Guja Dögg Hauksdóttir.

Þriðjudag 12. janúar kl. 20.
Kjarvalsstaðir - Högna Sigurðardóttir
Fyrirlestur Pétur H Ármannsson arkitekt.

Laugardagur 23. janúar kl. 15.
Kjarvalsstaðir - Högna Sigurðardóttir
Sýningarstjóraspjall Guja Dögg Hauksdóttir 
Sérstakt samstarf: Þjóðminjasafn Íslands

Laugardag 6. febrúar kl. 14.
Kjarvalsstaðir - Högna Sigurðardóttir
Fyrirlestur Pétur H Ármannsson arkitekt.

Styrktaraðilar: Minningarsjóður Dr. Phil. Guðjóns Samúelssonar, Mennta- og menningarmálaráðuneyti Íslands, Húsafriðunarnefnd, Bær listasetur, Myndhöfundasjóður Íslands, Íbúðalánasjóður Íslands, Franska sendiráðið á Íslandi, Argos ehf., Arkís, Arkibúllan arkitektar, Arkitektar Hjördís & Dennis ehf , Arkiteo ehf, Arkitektur.is, Arkþing ehf , Á stofunni arkitektar, Björgun ehf, BYKO, Einrúm ehf arkitektar, Framkvæmdasýsla ríkisins, Garðabær, Gláma/Kím arkitektar, Kanon arkitektar ehf, Kisan Concept Store, Listaháskóli Íslands - hönnunar- og arkitektúrdeild, Hornsteinar arkitektar ehf, Högnur, PK arkitektar ehf, Plúsarkitektar, Skipulags- og byggingarsvið Reykjavíkurborgar, Studio Granda arkitektar, Tark teiknistofan ehf , Teiknistofan Tröð ehf, Vestmannaeyjabær.

Þakkir: Format-Akron ehf, Hönnunarnmiðstöð Íslands, Húsasmiðjan, Leturprent ehf , Pixel prentþjónusta, Skipulags- og umhverfissvið Kópavogs, Tækni- og umhverfissvið Garðabæjar, Umhverfis- og framkvæmdasvið Vestmannaeyjabæjar.