Ólafur Elíasson

Hér er flest óvenjulegt. Nafnið er íslenskt, sem og allt ætterni; en Ólafur Elíasson er fæddur í Danmörku, bjó þar öll sín æskuár og stundaði þar sitt listnám. Hann býr í Berlín í Þýskalandi, en sinnir störfum og verkefnum um allan heim. Ólafur er ekki síður óvenjulegur meðal íslenskra listamanna vegna ferilsins. Hann hefur haldið á annan tug einkasýninga austan hafs og vestan á síðustu árum og tekið þátt í fjölda samsýninga. Loks hefur list hans vakið ómælda athygli þekktra listtímarita.  Á sýningunni er að finna fjögur verk, sem hvert um sig fangar athyglina óskipta. Fjölbreytnin er næg; verkin eru innandyra, utandyra og í bókarformi - allt eftir því sem listamanninum þykir hæfa viðfangsefninu.