Ásmundur Sveinsson: Nútímamaðurinn

Með sanni má segja að myndhöggvarinn Ásmundur Sveinsson (1893-1982) hafi verið nútímamaður alla tíð. Hann var talsmaður tækniframfara, uppbyggingar og mannjöfnuðar. Fjölbreytnin í list Ásmundar er í fullu samræmi við þetta viðhorf. Hann fylgdist vel með og var fljótur að tileinka sér það sem var efst á baugi hverju sinni.

Titlar eins og Framtíðin, Rafmagn, Í gegnum hljóðmúrinn, Geimdreki, Samhljómur hnattanna og Röngtenminnisvarði bera þessu viðhorfi Ásmundar glöggt vitni; hann hreyfst af tækninýjungum, og mörg verka hans tengjast framförum á þeim sviðum.

Það fer vel á því að fagna tímamótum hússins, sem fyrrum var heimili og vinnustofa listamannsins, með sýningu þar sem framsýni og atorkusemi Ásmundar er gert hátt undir höfði. Auk verka sem skírskota til nútímamannsins Ásmundar verður opnuð tímabundin sýning þar sem sýnd verða nokkur verk sem lentu í eldsvoðanum í Fákafeni í ágúst á síðasta ári, en búið er að gera við. Viðgerðarsaga þeirra er rakin í máli og myndum, allt frá því unnið var við björgun verkanna úr geymslu Fákafens til þess að viðgerð á þeim lauk nú fyrir skemmstu.