D1 Birta Guðjónsdóttir

Birta Guðjónsdóttir (f. 1977) notar speglun og tálsýnir til að ögra upplifun áhorfandans af tíma og rými. Verk hennar Einhver verður þar vísar til nærveru. Óljós spegilmynd áhorfandans verður hluti af verkinu eða er ekki sýnileg þar sem ætla mætti að hún birtist. Bjartur salurinn og kyrrðin í umhverfinu eru undirstrikuð í myndböndunum þar sem hæg og lítt áberandi hreyfing gefur til kynna tíma og leikur á skynjun áhorfandans af rými salarins. Með nærveru sinni í verkinu skoðar hún meðvitund mannsins um sjálfið og afstöðu til eigin myndar sem oft jaðrar við að vera vandræðaleg. Verkið afhjúpar hið hárfína augnablik þar sem mætast aðskildir raunveruleikar innra og ytra lífs.

Birta nam myndlist við Listaháskóla Íslands og útskrifaðist þaðan árið 2001. Hún var gestanemi við Kuuvataide listaakademíuna í Helsinki, Finnlandi einn vetur og lauk MA-gráðu frá Piet Zwart Institute í Rotterdam, Hollandi árið 2004.