Magnús Árnason: Homage

Það kann að virðast fásinna að eitt sinn var talið að lífverur gætu kviknað af lífvana efnum. Hugmyndin um sjálfkviknun lífs var þó ekki slegin af fyrr en á síðari hluta 19. aldar eftir miklar deilur. Franski efnafræðingurinn Louis Pasteur (1822–1895) átti mikilvægan þátt í afsönnun sjálfskviknunar og er þekktur fyrir einfaldar en áhrifamiklar tilraunir.

Í innsetningu Magnúsar Árnasonar er að finna endurgerð af tilraun Pasteur. Nærandi vökva hefur verið komið fyrir í tveimur svanahálsflöskum sem síðan er soðinn. Örverur ná ekki að berast í gegnum langan sveigðan hálsinn þó að flöskurnar séu opnar og vökvinn varðveitist tær. Önnur flaskan stendur ósnert en vökva úr hinni hefur verið hleypt úr belg flöskunnar inn í hálsinn og til baka, sem „smitar“ vökvann af örverum sem hafa safnast fyrir í stúti flöskunnar. Vökvinn ætti fljótlega að gruggast af bakteríugróðri en þróunin verður áhorfendum sýnileg yfir sýningartímann.

Homage er óður til Pasteur og framlags hans til vísindanna. Magnús hefur fengist við náttúru og náttúrufræði í verkum sínum en hér eru vísindi og saga orðin að rannsóknarefni í sjálfu sér. Með verkinu reynir listamaðurinn að enduruppgötva „sannleika“ og fagurfræðileg gildi vísindanna, sem hafa jafnvel fallið í gleymsku.

Magnús Árnason (f.1977) lauk magistergráðu frá Akademie der Bildenden Künste í Vínarborg árið 2003. Áður stundaði hann nám bæði við Iðnskólann í Hafnarfirði og tónlistarnám við FÍH, Reykjavík. Valdar einkasýningar: 2010, Af lifun, Náttúrufræðistofa Kópavogs, Kópavogur // 2007, Polymorph, Locustprojects, Miami // 2005, Sjúkleiki Benedikts, Kling&bang, Reykjavík. Valdar samsýningar: 2009, when you sleep you don´t sin, Nowy Teatr, Warsaw // 2008, LISTE 08- The Young Art Fair, Basel // 2006, Pakkhús Postulanna, Listasafn Reykjavíkur-Hafnarhús, Reykjavík // 2005, The Pantagruel Syndrome, T1 Torino Triennale Tremusei, Torino.