Sýningaropnun í D-sal – Berglind Jóna Hlynsdóttir: Class Divider

Hvernig búum við til tæki og kerfi til að flokka fólk eftir samfélagstöðu?
Berglind Jóna Hlynsdóttir (f. 1979) opnar sýninguna Class Divider í D-sal Hafnarhússins, Listasafni Reykjavíkur, fimmtudaginn 3. mars kl. 17. 

Berglind Jóna spyr gjarnan spurninga er snúa að almenningsrýmum. Í borgarsamfélagi, þar sem umhverfið er manngert og hver staður er hannaður í einhverjum tilgangi, kannar Berglind umhverfið út frá sögu og væntingum sem samfélagið ber til þeirra. Í verkinu Class Divider fjallar Berglind um visst fyrirbæri sem er hannað í þeim tilgangi að aðgreina flugfarþega. Class divider, sem þýðir einfaldlega stétt-skipting, vekur upp spurningar um það hvernig við búum til tæki og kerfi til að flokka fólk eftir samfélagstöðu á hinum ýmsu stöðum. 

Berglind Jóna hóf feril sinn sem ljósmyndari. Hún lauk BA gráðu frá Listaháskóla Íslands 2006 og MA gráðu frá Valand School of Fine Arts í Svíþjóð árið 2010. Berglind Jóna hefur starfað sem myndlistarmaður á Íslandi, í Svíþjóð og í Brasilíu. Hún hefur unnið að stórum verkefnum í almenningsrýmum og tekið þátt í ótal alþjóðlegum samsýningum og samstarfsverkefnum, en þetta er fyrsta einkasýning hennar í opinberu safni. 

Sýningaröðin í D-sal hófst árið 2007 með það að markmiði að gefa efnilegum listamönnum tækifæri til að vinna í Listasafni Reykjavíkur og beina athygli að nýjum og áhugaverðum hræringum innan listheimsins. Í D-sal eru að jafnaði sýnd verk eftir listamenn sem ekki hafa áður haldið einkasýningar í stærri söfnum landsins.