Ásmundur Sveinsson - Meistarahendur

Ásmundur Sveinsson var einn af frumkvöðlum  íslenskrar höggmyndalistar. Hann sótti víða innblástur í verk sín, ekki aðeins til íslenskrar alþýðu, bókmennta og náttúru heldur líka til tækninýjunga og ýmissa huglægra viðfangsefna. Á sýningunni má sjá verk sem spanna langan feril listamannsins og hvernig sýn hans þróaðist gegnum tíðina. Meðal verka er sveinsstykki Ásmundar í tréskurðarnámi sem hann lauk árið 1919, höggmyndir frá námsárum hans við sænsku ríkisakademíuna og frá áralangri dvöl hans í París.

Verk Ásmundar taka síðan umtalsverðum breytingum eftir nám og heimkomu til Íslands þar sem hann leggur sig fram um að skapa ný mótíf í stað þess að halda í hefðina og akademísk gildi hvað varðar hlutföll og anatómíu. Loks eru á sýningunni abstraktverk sem listamaðurinn vann á síðustu áratugum ævinnar. Hér má sjá hvernig ásýnd verka hans breytast og form þeirra verða huglægari þegar líða tekur á ferilinn.

Ásmundur Sveinsson sagði sjálfur að sér leiddust deilur um liststefnur, að hans mati var margvíslegur stíll og ólíkar stefnur í listum rétt eins og margvíslegt rím í kveðskap. Fjölbreytnin í list Ásmundar er í fullu samræmi við þetta viðhorf. Hann fylgdist vel með og var fljótur að tileinka sér það sem efst var á baugi hverju sinni.