D22 Björk Viggósdóttir - Flugdrekar

Í verkum sínum leikur Björk á ofurnæmni skynfæranna sem kallast á við ímyndunarafl áhorfandans. Dularfull hógværð liggur í loftinu og bjartar litasamsetningar verða yfirþyrmandi í sýningu hennar sem nefnist Flugdrekar. Silkidrekarnir hafa straumlínulega lögun en eru í kyrrstöðu, þeir bíða átekta og eru tilbúnir að hefja sig til flugs. 

Myndmálsheimur Bjarkar er ljóðrænn og táknmyndirna eru margræðar. Flugdrekar er eitt af viðfangsefnum Bjarkar, en þeir eiga sér langa sögu og hafa í gegnum aldirnar leikið fjölbreytt hlutverk. Flugdrekar hafa verið notaðir í ýmsum tilgangi eins og til að senda skilaboð, við hátíðleg tilefni, í íþróttum og jafnvel til rannsókna. Virkni flugdrekans er fólgin í krafti vindsins sem knýr drekann áfram í frjálsum loftdansi. Á sama tíma og flugdrekinn svífur frjáls er hann bundinn strengjum sem skapa eilífa togstreitu á milli frelsis og hafta. Þessi tvö ólíku hugtök eiga í stöðugu samtali og geta ekki hvort án annars verið. Það er þessi tvíræði tónn sem verður að umfjöllunarefni Bjarkar. Á velli glímukappanna í myndbandinu (Hreyfingar) lúta þátttakendur ákveðnum lögmálum og reglum leiksins. Fyrir þá sem ekki þekkja til íþróttarinnar verða stöðugir núningar leikmannanna eins og tilraun til að forma og virkja rýmið. Reglurnar skapa ramma jafnt og strengirnir sem takmarka flug flugdrekanna. Hugurinn tekst á loft og andartak tómarúmsins tekur við, þangað til kippt er í strenginn sem vekur okkur til meðvitundar á ný. En þannig eru einmitt viðmiðin sem við setjum okkur til að skilgreina hver við erum.

Iðulega samanstanda verk Bjarkar af fjölbreyttum miðlum sem renna saman í draumkenndar innsetningar þar sem krafti ímyndunaraflsins er gefinn laus taumur. Innsetningar hennar eiga það til að lifna við á sýningartímanum og hlutir færast úr stað vegna gjörninga sem setja allt úr skorðum og búa þannig til ný sjónarhorn.

Björk Viggósdóttir (f. 1982) býr og starfar í Reykjavík. Hún hefur tekið þátt í samsýningum hér heima og erlendis. Björk hefur komið að fjölbreyttum verkefnum síðan hún útskrifaðist árið 2006 frá Listaháskóla Íslands. Meðal verkefna má nefna dansverkið Fresh Meat, sem hún setti upp ásamt Sigríði Soffíu Níelsdóttur dansara í London og á Íslandi 2009, og hljóðinnsetninguna Soundscape í MMX-galleríinu í Berlín 2010. Einnig sýndi hún vídeóverk í Chelsea Art Museum í New York og  tók þátt í Listahátíð Reykjavíkur 2009. Björk kom að uppfærslu á gríska harmleiknum Bakkynjur í Þjóðleikhúsinu 2006 þar sem vídeóverk hennar var hluti af leikmyndinni.