D8 Gunnhildur Hauksdóttir

Gunnhildur Hauksdóttir (f. 1972) hefur sýnt innsetningar, myndbandsverk og gjörninga oft gróflega unnin og úr hráum efniviði. Vísanir verkanna eru opnar fyrir túlkun áhorfandans og fjalla um manninn, umhverfi hans og viðmið. Í verkinu Cultus Bestiae / Tignuð Skepnan notar Gunnhildur myndskeið sem hún hefur tekið af sýningarhestum í Þýskalandi. Hún fangar samband hests og knapa sem einkennist af kraftmiklum mótsögnum tálgaðs vilja og dýrslegrar nálægðar. Áhorfandinn finnur fyrir líkamlegri nálægð dýrsins í nærmyndum af grönum eða dregst inn í draumkennda sýn af þokkafullum fákum á kraftmiklu stökki. Tign skepnunnar og mótsagnakennt eðli fágunar og dýrslegrar hegðunar, krafts og þokka, frelsis og undirgefni, mýktar og afls, leiða hugann að stöðu hestsins sem táknmyndar líkamlegar orku, oft kynorku, í draumum manna.

Gunnhildur útskrifaðist frá Listaháskóla Íslands árið 2001 og stundaði framhaldsnám í myndlist við Sandberg Institute í Amsterdam 2002 – 2005. Hún er meðlimur í hinni alþjóðlegu Dieter Roth akademíu og hefur starfað í Berlín undanfarin ár.