Erró - Japönsk Ástarbréf (1979 - 1980)

Japönsk ástarbréf eru ekki einkennandi fyrir myndlist Errós. Sérstaða syrpunnar í höfundarverki hans kemur fram í myndrænu inntaki, þar sem ritmál er í samkeppni við annað myndefni. Sérstaðan felst ennfremur í litaskalanum, en litbrigði verkanna eru grá og brún, sem er ákaflega óvenjulegt hjá þessum litaglaða málara. Sköpunarsaga verkanna tengist heimsreisu málarans 1971-1972, en þá fór hann meðal annars til Japans.

Hjá fornsala í Tókíó, kom listamaðurinn auga á gamla myndskreytta bók og heillaðist hann af ljósmyndum af persónum og eftirprentunum af ýmsum heimildum (bréfum, minnisblöðum, blaðsíðum úr bókum), sem tengjast þessum persónum. Hann fékk bóksalann til að selja sér ljósrit af öllum pappírunum og þegar hann kom aftur heim til Parísar fór hann að vinna með þessi gögn án þess að skilja neitt í textanum. Honum skildist samt á myndunum að um væri að ræða sögur af hjónum eða pörum. Úr þessu hráefni gerði hann klippimyndir, sem voru fyrirmyndir að málverkaseríunni.

Miklu seinna, með hjálp Alain Jouffroy og Fusako, japanskri konu hans, fékk Erró vitneskju um að nokkrar af þessum persónum, sem hann hafði málað voru menntakonur, sem voru með andóf gegn japönsku þjóðfélagi.