Íslensk abstraktlist

Yfirlitssýning á íslenskri abstraktlist frá upphafi til 1987. Það er forsvarsmönnum Reykjavíkurborgar til mikillar ánægju að Kjarvalsstaðir skuli nú efna til sýningar á íslenskri abstraktlist, sem er fyrsta yfirlitssýningin um þann merkilega þátt í íslenskri myndlist.

Í dag er abstraktlistin ekki lengur tilfinningarmál. Hún hefur unnið sér sess í hugum fólks og menn hafa lært að meta abstrakt myndlist við hlið annarra greina myndlistarinnar á sama hátt og rímuð og órímuð ljóð eiga sér nú sess hlið við hlið í menningararfi þjóðarinnar.