Íslensk myndlist 1900-1950: Frá landslagi til abstraktlistar

Sýningin rekur sögu íslenskrar myndlistar frá fyrstu kynslóð menntaðra myndlistarmanna um aldamótin 1900  fram til þess tíma þegar abstraktlistin ruddi sér til rúms hálfri öld síðar. Sögunni er skipt í fjórar frásagnir í tveim sýningarsölum.

Vestursalur: Frásögnin hefst með rómantískri náttúrutúlkun og symbólisma brautryðjendanna og rekur áhrif nýrra og róttækra viðhorfa í evrópskri myndlist á verk þeirra. Önnur frásögnin lýsir þróun landslagsmálverksins á blómaskeiði þess á árunum 1930-1950.

Kjarvalssalur: Þriðja frásögnin fjallar um breyttar áherslur nýrrar kynslóðar 1930-1950, þar sem félagslegur raunveruleiki samtímans er í fyrirrúmi. Að lokum eru rakin upphafsár abstraktlistar hér á landi og þau áhrif sem nýjar hugmyndir um hlutverk myndlistarinnar höfðu á árunum 1940-1950.

Á sýningunni eru málverk og höggmyndir eftir 40 listamenn. Verkin koma úr ýmsum áttum og mörg þeirra hafa ekki verið sýnd opinberlega um langt árabil.

Sýningarstjóri er Ólafur Kvaran

Sýningarhönnuður er Ívar Valgarðsson