Ljóshærð ungfrú heimur 1951

Keppnin um fegursta fljóð veraldar hóf göngu sína árið 1951. Birgir Snæbjörn Birgisson hefur málað andlitsmyndir af öllum sigurvegurum keppninnar frá upphafi en serían er sýnd í fyrsta skipti á Kjarvalsstöðum. Birgir málar allar fegurðardrottningarnar 56 ljóshærðar og í svo ljósum litum að þær eru vart sýnilegar. Hluti málverkanna var fyrst sýndur í Gautaborg fyrr á þessu ári en sýningin í Listasafni Reykjavíkur fer síðan til Lundúna.

Birgir Snæbjörn Birgisson (f.1966) nam myndlist við Myndlista- og handíðaskóla Íslands og École des Arts Décoratifs í Strassborg í Frakklandi.

Sýningarstjóri er Mika Hannula, rithöfundur, fyrirlesari, og gagnrýnandi. Hann er nú starfandi prófessor í listrannsóknum í myndlista- og hönnunardeild, Háskólans í Gautaborg.