Mynd af heild 2 – Kjarval bankanna

Íslensku bankarnir hafa keypt og varðveitt mörg verk eftir íslenska listamenn og eiga stór söfn verka eftir Jóhannes S. Kjarval. Verkin prýða fundarherbergi og afgreiðslur útibúa bankana um allt land. Á þessari sýningu gefst í fyrsta sinn tækifæri til að sjá öll þessi verk á einum stað. Sýningin er framhald af þeirri viðleitni Listasafns Reykjavíkur að gefa sem víðtækasta mynd af ferli Kjarvals. Öll málverk eftir hann í eigu safnsins sjálfs voru dregin fram í dagsljósið á sýningunni "Mynd af heild" sem var opnuð á Kjarvalsstöðum í desember 2012. Nú er komið að Kjarval bankanna, þar sem er að finna margar gersemar sem hafa ekki sést fyrr á opinberum sýningum. Sýningin er í anda salon-sýninga þar sem málverkin þekja alla veggi Kjarvalssalarins, frá gólfi og upp í loft.