Myndlistin okkar

Hvert er eftirlætis listaverkið þitt í safni Listasafns Reykjavíkur?

Síðastliðið vor var blásið til kosningaleiks á Betri Reykjavík undir yfirskriftinni Myndlistin okkar. Þar gafst fólki tækifæri til þess að velja listaverk á sýningu á Kjarvalsstöðum úr safneign Listasafns Reykjavíkur. Á samnefndri sýningu sem er opnuð á Menningarnótt eru þau verk sem hlutu flest atkvæði almennings til sýnis. Sýningarstjórn og verkaval er algerlega úr höndum safnsins og fjöldi verka ræðst af plássi í salnum. Úrvalið er fjölbreytt og áhugaverð blanda af listsköpun frá ólíkum tímum. Þar birtist einstök sýn á þessa sameign borgarbúa sem í heild telur 17 þúsund verk.

Kosningaverkefnið  er hluti af 50 ára afmæli Listasafns Reykjavíkur, 1973-2023, þar sem safneigninni er gert hátt undir höfði með ýmsum hætti. Þau verk sem hlutu flest atkvæði eru Hringfarar eftir Önnu Rún Tryggvadóttur, Köttur III eftir Matthías Rúnar Sigurðsson og Uppspretta eftir Bryndísi Jónsdóttur. Samtals voru greidd  26.192 atkvæði og fjöldi verka sem fengu a.m.k eitt atkvæði er 2.396

Inni í sýningarsalnum er kubbur þar sem settar verða upp smásýningar undir heitinu Myndlistin þeirra. Þar býður safnið samstarfsaðilum sínum og fastagestum gegnum árin að velja saman verk eftir eigin höfði. Smásýningarnar standa aðeins rúma viku í senn og dreifast yfir sýningartímabilið. Gestasýningarstjórar eru Klambrar bistro, Bræðurnir Baldursson, Hlutverkasetur, Íslenski dansflokkurinn (sem einnig fagnar 50 ára afmæli í ár) og nemendur í Víkurskóla.

1. Pop-up sýning KLAMBRAR BISTRO                      19.08.–29.08.

2. Pop-up sýning BRÆÐURNIR BALDURSSON         02.09.–12.09.

3. Pop-up sýning HLUTVERKASETUR                        16.09.–26.09.

4. Pop-up sýning VÍKURSKÓLI                                    14.10.–29.10.  

5. Pop-up sýning  ÍSLENSKI DANSFLOKKURINN     30.09.–10.10.