Roni Horn - MY OZ

Sýningin My Oz í Listasafni Reykjavíkur – Hafnarhúsi er yfirgripsmesta sýning á verkum Roni Horn sem sett hefur verið upp á Norðurlöndunum. Verkin á sýningunni eru valin í samvinnu við listamanninn og er ætlað að endurspegla náið samband hennar við Ísland en jafnframt að veita innsýn í feril hennar. Á sýningunni eru ljósmyndir, þrívíð verk, teikningar og bækur.

Roni Horn hefur heimsótt Ísland reglulega síðan á miðjum áttunda áratugnum, þegar hún kom hingað sem ungur listnemi. Hún hefur ferðast meira um landið en flestir Íslendingar og í mörgum af sínum þekktustu verkum hefur hún sótt innblástur sinn í óspillta náttúru landsins. Sköpunarverk hennar, Vatnasafnsin  / Library of Water í Stykkishólmi geymir m.a. vatn úr 24 jöklum landsins.

Roni Horn er fædd í Bandaríkjunum árið 1955 og býr í New York. Hún lauk myndlistarnámi frá Rhode Island School of Design árið 1975 og stundaði síðan meistaranám við Yale háskóla, þaðan sem hún útskrifaðist 1978. Hún hefur hlotið alþjóðlega viðurkenningu fyrir verk sín, sem spanna allt frá skúlptúrum til bóka eða ljósmynda innsetninga. Sýningaferill hennar hófst um 1980 og hafa verk hennar verið sýnd víða um heim, meðal annars í stórum, alþjóðlegum söfnum.