D17 Magnús Helgason

„Viðfangsefni mitt er að búa til fallegar myndir. Myndlist sem hittir áhorfandann beint í hjartastað og þarfnast engra útskýringa við.“

„Til þess leita ég eftir innblæstri hvar sem hann er að finna, til dæmis í tilviljunum, tónlist, litum, texta, þjóðfélagsumræðu og myndlist annara.“

„Smám saman hef ég komist að þeirri niðurstöðu að árangursríkast fyrir mína myndlist sé að skipta mér sem minnst af því hvernig hún verður til. Best er að ýta af stað einhverri röð tilviljana eða lítið meðvitaðra ákvarðana og reyna svo að stýra ferlinu í eftirsóknarverðan farveg með því að velja og hafna. Útkoman er því alltaf ófyrirsjáanleg í upphafi, því reynslan hefur kennt mér  að allar líkur eru á því að ég skemmi bara fyrir með því að skipuleggja og ofpæla verkin fyrirfram.“

Magnús Helgason, 2010

Um listamanninn: Magnús Helgason (b. 1977) útskrifaðist með B.A. gráðu í málun, ljósmyndun og kvikmyndagerð frá Akademie voor beeldende kunst í Enschede, Hollandi árið 2001. Hann hefur sýnt kvikmyndir sínar og málverk á Íslandi og í ýmsum borgum Ameríku, Evrópu og Asíu.