Erró - Teikningar

Sýningin, sem fengið hefur heitið Teikningar, samanstendur af teikningum sem Erró hefur gert frá árinu 1944  fram til vorra daga. Teikningin er vafalítið sá þáttur í list Errós sem hann er hvað minnst þekktur fyrir. Verkin eru að mestu höfð í tímaröð og sett upp í mismunandi samhangandi seríum.

Á fyrri hluta sýningarinnar eru teikningar af fjölbreytilegri stílgerð og mismunandi viðfangsefnum sem listamaðurinn gerði á mótunarárunum og á fyrri hluta ferilsins. Um er að ræða rissmyndir, stúdíur og skissur, en einnig sjálfstæð listaverk. Teikningarnar, í svörtu og hvítu og í lit, eru unnar með margvíslegri tækni, svo sem blýanti, kolum, tússi, bleki, vaxlitum, gvasslitum, vatnslitum eða blandaðri tækni, og þær einkennast oftast af frjálsum og þróttmiklum línum.

Á seinni hluta sýningarinnar koma glögglega fram þau þáttaskil sem urðu í list hans í byrjun sjöunda áratugarins, þegar hann tekur upp vinnuaðferðir sem byggjast á samklippitækni (collage). Frá þeim tíma skiptir listamaðurinn um aðferð í sköpun sinni og notar klippimyndirnar sem fyrirmyndir að verkum sínum. Höndin er þá ekki lengur uppfinningasöm og túlkandi heldur fyrst og fremst tæki til að yfirfæra myndir á striga og pappír, oft með hjálp skuggamyndavélar eða skjávarpa.

Sýningin, sem upprunalega var gerð fyrir Nútímalistasafnið í Saint-Étienne árið 2010 en birtist hér í endurgerðri útfærslu, er skipulögð í náinni samvinnu við Erró og er byggð á verkum úr einkasafni listamannsins og Errósafni ‒ Listasafni Reykjavíkur.