Gálgaklettur og órar sjónskynsins

Á sýningunni Gálgaklettur og órar sjónskynsins er að finna lítinn hluta af rúmlega 50 málverkum Jóhannesar S. Kjarvals (1885-1972) sem sýna tiltekinn stað í Garðahrauni á Álftanesi. Þangað sótti Kjarval í nærri aldarfjórðung til að mála nokkra steina og hraunstrítur.  Hann kallaði staðinn „Gálgaklett“ en hinn raunverulegi Gálgaklettur er á allt öðrum stað í hrauninu.  Ekki verður séð að þessi staður hafi neitt sérstakt upp á að bjóða umfram það sem almennt gerist í íslensku hrauni. Málverkin sýna klettinn í fjölbreytilegum myndum en varpa um leið ljósi á flókið viðfangsefni listamannsins.

Með því að nýta sér heimspekilegar hugmyndir fyrirbærafræðinnar um sjónskynið - sem byggir á samspili hugar og líkama einstaklingsins gagnvart heiminum - má rýna nánar í stefnumót Kjarvals við „Gálgaklett“. Tilvistarlegar vangaveltur um mörk ytri og innri veruleika endurróma gegnum alla sögu listarinnar. Því endurspeglar stór hluti sýningarinnar álíka tilraunir sem viðvarandi viðfangsefni listarinnar í íslensku samhengi. Valin verk fjögurra kynslóða íslenskra listamanna rekja endurtekin stef óra sjónskynsins frá Kjarval og samtímamönnum hans til samtímalistar dagsins í dag.