Sýning sýninganna, Ísland í Feneyjum í 50 ár

La Biennale di Venezia eða Feneyjatvíæringurinn var haldinn í fyrsta skipti árið 1895 og er enn þann dag í dag einn af heimsins virtustu myndlistarviðburðum. Í meginatriðum samstendur tvíæringurinn af sýningum þjóðarskálanna, sem eru staðsettir á aðalsýningarsvæðinu í Kastalagörðunum (Giardini del Castello) eða víða um borgina, og hinsvegar alþjóðlegum stórsýningum sem stjórnendur tvíæringsins hafa umsjón með. Hver þjóð velur sína fulltrúa og mynda þjóðarskálarnir kjarna sýningarinnar. Þetta fyrirkomulag ásamt hinu einstaka umhverfi borgarinnar skapar Feneyjatvíæringnum sérstöðu sem hefur orðið til þess að hann er stundum nefndur Sýning sýninganna. Árið 2009 tóku 77 þjóðir þátt.

Þátttaka Íslendinga hófst árið 1960 þegar Jóhannes Sveinsson Kjarval og Ásmundur Sveinsson voru valdir til að vera fulltrúar Íslands á þrítugasta tvíæringnum. Fram til  ársins 1984 var þátttakan nokkuð tilviljanakennd eða þar til Íslendingar tóku á leigu finnska skálann í Kastalagörðunum. Eftir það varð hún regluleg og hafa samtals 22 íslenskir listamenn sýnt á Feneyjatvíæringum síðan 1960. Markmiðið með slíkri þátttöku er að kynna íslenska list í alþjóðlegu umhverfi og komast í snertingu við það sem hæst ber í listheiminum hverju sinni.

Á Sýningu sýninganna gefst nú í fyrsta skipti tækifæri til að sjá verk eftir íslensku Feneyjafaranna samankomin á einum stað. Tilgangurinn er að vekja athygli á mikilvægi tvíæringsins fyrir íslenskan myndlistarheim, skoða framvinduna í þátttökusögu Íslendinga og kanna stöðu okkar innan hins alþjóðlega samhengis.

Verkin á sýningunni eru mörg úr safneign Listasafns Reykjavíkur og Listasafns Íslands, en einnig úr einkaeign og eign listamannanna sjálfra.