Hrafnhildur Arnardóttir / Shoplifter: Chromo Sapiens

Innsetningin Chromo Sapiens er verk Hrafnhildar Arnardóttur / Shoplifter og var framlag Íslands á Feneyjatvíæringnum 2019. Íslenska hljómsveitin HAM semur tónverk sem hljómar í verkinu.

Listsköpun Hrafnhildar Arnardóttur (f. 1969), sem einnig er þekkt sem Shoplifter, liggur á mörkum myndlistar, gjörninga og tísku og sækir hún áhrif frá dægurmenningu og fjöldaframleiðslu, auk alþýðulistar og handverkssögu. Á undanförnum fimmtán árum hefur hún á umfangsmikinn hátt kannað notkun og táknrænt eðli hárs, sjónræna og listræna möguleika þessarar líkamlegu afurðar og hvernig upplifa megi hár sem birtingarmynd sköpunar í nútíma menningu. List Hrafnhildar hverfist að mestu um skúlptúra, staðbundnar innsetningar og veggverk, sem fjalla jafnan um hégóma, sjálfsmynd, tísku, fegurð og goðsagnir í almannavitundinni. Fínlegur húmor gegnir stóru hlutverki í list hennar og endurspeglast vel í notkun á miklu magni marglits gervihárs, hárlenginga sem hún hnýtir, flækir og fléttar með hinu fallega og gróteska, og teflir saman upplifun á fjöldaframleiddum munum andspænis þeim einstöku.

Chromo Sapiens er þakið miklu magni af einkennisefniviði Hrafnhildar; gervihári. Litir, hljóð og aðlaðandi áferð leiða gesti í gegnum þrjú ólík rými, sem umlykja þá í myndrænum og hljóðrænum samruna. Þegar stigið er inn í innsetninguna mæta þér drungaleg hellakynni, Primal Opus, í litasamsetningum eldhræringa sem virkjuð eru af neðanjarðar hljóðheimi hljómsveitarinnar HAM. Hellaköfun þessi leiðir þig áfram inn í Astral Gloria, þar sem skærlitaðar hárbreiður bylgjast um og hjúpa sig í ofgnótt sinni umhverfis sýningargesti. Litadýrð, áferð og hljóðmynd örva skilningarvitin með æpandi litum bifandi hárfaðms sem mýkist við lendingu í himnesku hreiðri Opium Natura.  Þar flökta dúnmjúkir litatónar sem umvefja gesti friðsæld og sakleysi sjónrænnar alsælu.

Tónverkið, sem hljómsveitin HAM semur fyrir Chromo Sapiens, ómar um þann loðna ham er Hrafnhildur þekur salarkynni Listasafnsins með. Djúpar drunur og dynjandi niður tónheims HAMverja hreyfa við líkamlegum skynfærum með nötrandi hljóðbylgjum sem hnoða og þenja hverja taug. HAM hefur einnig samið einkennislag fyrir sýninguna en í textanum segir: "Þú átt ekki séns og sál þín er lens nema þú opnir hjarta þitt fyrir Chromo Sapiens".

Birta Guðjónsdóttir, sýningarstjóri Chromo Sapiens í íslenska skálanum í Feneyjum, segir um verkið: “Hrafnhildur hefur þróað einstakar aðferðir við að vinna með textíl á staðbundinn hátt og hefur hlotið mikið lof fyrir verk sín og vinsældir meðal almennings. Það er sannarlega áhugavert og spennandi að samstarf okkar hafi borið okkur til Feneyja, þar sem hún skapaði viðamestu sýningu sína til þessa, innsetningu sem hreyfir við hugsun og skynfærum gesta. Og nú í Listasafn Reykjavíkur. Maður gengur inn í verkið sem Homo Sapiens en gengur út sem Chromo Sapiens.”

Feneyjatvíæringurinn var opnaður almenningi þann 9. maí 2019 og stóð yfir til 24. nóvember. Chromo Sapiens hlaut mikið lof um 40.000 gesta íslenska skálans í Feneyjum og hafa umfjallanir um verkið birst í nær eitt hundrað alþjóðlegum listtímaritum og dagblöðum auk þess sem meirihluti gesta gerði verkinu og upplifun sinni af því skil á samfélagsmiðlum. Það er mikill fengur fyrir safngesti Listasafns Reykjavíkur að fá að upplifa verkið á Íslandi. Sýningin er unnin í samstarfi við Kynningarmiðstöð íslenskrar myndlistar.