Jasper Morrison, Marc Newson og Michael Young

Þeir Jasper Morrison, Marc Newson og Michael Young eru, þrátt fyrir ungan aldur, þegar á meðal hinna fremstu á alþjóðavettvangi á sviði hönnunar. Verk þeirra eru kynnt í öllum helstu hönnunarritum samtímans og listinn yfir þau fyrirtæki sem þeir starfa fyrir, er nær samhljóða skrá yfir virtustu hönnunarfyrirtæki heims. Það er mikill fengur fyrir Listasafn Reykjavíkur að geta boðið þá félaga velkomna á Kjarvalsstaði. Við höfum notið þeirrar gæfu í hönnunarmálum að íslenskt listafólk hefur leitað víða í menntun sinni. Hin norræna þróun hefur ætíð staðið okkur nærri og verið vel kynnt hér í gegnum fjölda sýninga. Hönnun frá öðrum heimshornum hefur ekki verið jafn tíður gestur en með þessari sýningu vill Listasafn Reykjavíkur leggja sitt af mörkum til að víkka sjóndeildarhringinn á þessu sviði.