Garðhúsabærinn

Margir af kunnustu arkitektum heims eiga teikningar og líkön á sýningunni Garðhúsabærinn sem opnuð verður á Kjarvalsstöðum laugardaginn 27. maí kl.15:00. Hún er sameiginlegt framlag Arkitektafélags Íslands og Listasafns Reykjavíkur til verkefnisins Reykjavík menningarborg Evrópu árið 2000 og dagskrár Listahátíðar í Reykjavík og helsti viðburður á sviði byggingarlistar á dagskrá þess.

Sýningin ber yfirskriftina Garðhúsabærinn eða Kolonihaven sem skírskotar til lítilla húsa sem margir Íslendingar reistu sér á sérstökum ræktunarlöndum, um miðbik 20. aldar. Þar sem Kringlan stendur nú var m.a. þyrping af garðblettum og skýlum og myndaðist þar á sumrin lítið samfélag garðhúsaeigenda.

Þetta kærkomna afdrep Reykvíkinga frá amstri dagsins er ekki sér íslenskt fyrirbæri því samsvörun er að finna hjá öðrum þjóðum og varð t.a.m. kveikja sýningarstjórans Kirsten Kiser að þessu alþjóðlega verkefni. Hún setti Garðhúsabæjasýninguna fyrst upp í Kaupmannahöfn árið 1996 og síðan árið 1998 í Stokkhólmi. Í bæði skiptin báru borgirnar Menningarborgartitil Evrópu. Það lá því beinast við að næsti viðkomustaður sýningarinnar yrði Reykjavík, menningarborg Evrópu árið 2000.